Ректорын мэндчилгээ

Проф. Доктор Б.Батцэнгэл

МГИТС-ийн ректор

Falling Walls Lab Ulaanbaatar Mongolia ерөнхий шүүгч

Эрхэм хүндэт зочид оо,

Эрхэм шүүгчдийн бүрэлдэхүүний гишүүд ээ,

Эрхэм оролцогчид, хамтран зүтгэгчид, анд нөхөд өө,

Та бүхнийг “Falling Walls Lab Ulaanbaatar, Mongolia 2026” арга хэмжээнд хүрэлцэн ирсэнд чин сэтгэлээсээ баяртайгаар угтан мэндчилж байна.

GMIT нь 2019 оноос хойш “Falling Walls Lab Mongolia” арга хэмжээг зохион байгуулж ирсэндээ бахархдаг. Энэхүү арга хэмжээ жил бүр залуу судлаачид, оюутнууд, шинийг санаачлагчдад үзэл санаагаа танилцуулах, хэвшмэл ойлголтыг сорих, олон улсын хамтын нийгэмлэгтэй холбоо тогтоох боломж олгодог.

“Falling Walls”-ийг онцгой болгодог зүйл бол энгийн атлаа хүчирхэг нэг асуулт юм:

Та ямар ханыг нураахыг хүсэж байна вэ?

Энэ жил бид шилдэг найман оролцогчтой. Тэдний дэвшүүлж буй сэдвүүд инновац хэчнээн өргөн хүрээтэй, олон талт байдгийг тод харуулж байна.

Оролцогчид эмнэлгийн протез болон бөөрний өвчлөл, үе тэнгийн дээрэлхэлт, нүүдлийн ахуйг цахим ертөнцтэй холбох нь, литийн нөөц, эрчим хүчний стратегийн нөөц, эмнэлгийн мэдээлэл, цацрагийн технологи, хог хаягдлыг ангилан ялгах, бохир усыг био цахилгаан эрчим хүч болгон хувиргах зэрэг сэдвээр илтгэл тавина.

Эдгээр нь хоорондоо эрс ялгаатай сэдвүүд. Гэвч тэдгээрийг нэг нийтлэг зүйл нэгтгэж байна:

санаа бүр шийдвэрлэх ёстой нэг “хана”-ыг тодорхойлж, түүнийг даван туулах арга замыг эрэлхийлж байна.

Зарим хана нь технологийн, зарим нь нийгмийн, зарим нь байгаль орчны шинжтэй. Харин зарим нь бидний сэтгэлгээний хүрээнд оршдог хана юм. Чухам ийм учраас бидэнд “Falling Walls Lab” шиг арга хэмжээ хэрэгтэй.

Инженерчлэл, технологи, байгалийн нөөц, тогтвортой хөгжлийн чиглэлээр үйл ажиллагаа явуулдаг их сургуулийн хувьд GMIT нь салбар хоорондын мэдлэг, туршлага огтлолцож, залуус үзэл санаагаа бодит шийдэл болгон хөгжүүлэх боломжтой энэхүү талбарыг бүрдүүлж байгаадаа туйлын баяртай байна.

Мөн манай түншүүд болон дэмжигчдэд, ялангуяа Falling Walls Foundation, DAAD, ХБНГУ-ын Элчин сайдын яам, Эдийн засаг, хөгжлийн яам, AMPMC төрийн бус байгууллага, Монгол Улсын Их Сургууль, KAS, GIZ болон энэхүү арга хэмжээг зохион байгуулахад хувь нэмрээ оруулсан нийт байгууллага, хувь хүмүүст чин сэтгэлийн талархал илэрхийлье.

Энэ жил Монгол, Германы боловсролын салбарын солилцоо, хамтын ажиллагааны 100 жилийн ой тохиож буйгаараа онцгой ач холбогдолтой.

“Falling Walls” нь Монголын залуу шинийг санаачлагчдыг шинжлэх ухаан, технологи, шинэ үзэл санааны олон улсын сүлжээнд нэгтгэж буй, хоёр орны олон жилийн хамтын харилцааны бас нэгэн тод жишээ юм.

Эрхэм оролцогчид оо,

Та бүхэнд ердөө гурван минут бий.

Ямар ханыг нураахыг хүсэж байгаагаа, энэ нь яагаад чухал болохыг, мөн та бүхний дэвшүүлж буй санаа уг саадыг даван туулахад хэрхэн туслахыг бидэнд өгүүлнэ үү.

Өнөөдөр өөр өөр туршлага, ялгаатай үзэл санаа бүхий найман оролцогч өрсөлдөж байгаа тул шүүгчдийн бүрэлдэхүүнийг амаргүй сонголт хүлээж байна.

Гэвч ялагч ганцхан байна.

“Falling Walls Lab Mongolia 2026”-ын ялагч Берлин хотноо болох “Falling Walls Science Summit”-д оролцох эрхтэй болно. Тэнд дэлхийн өнцөг булан бүрээс хүрэлцэн ирэх шинжлэх ухаан, бизнес, бодлого боловсруулах салбарын тэргүүлэх төлөөлөгчидтэй уулзаж, санал бодлоо солилцох боломжтой.

Нийт 8 оролцогчдоо өндөр амжилт хүсье. Өнөөдрийн илтгэлүүд шүүгчдийн бүрэлдэхүүн, үзэгчид төдийгүй, хамгийн чухал нь оролцогчид та бүхэнд харилцан урам зориг өгнө гэдэгт итгэлтэй байна.

Харин ялагчдаа хандан хэлэхэд: 2026 оны арваннэгдүгээр сард Берлин хотноо болох “Falling Walls Science Summit”-д Монгол Улсаа төлөөлөн оролцохыг тань бид тэсэн ядан хүлээж байна.

Ингээд “Falling Walls Lab Ulaanbaatar, Mongolia 2026” арга хэмжээг албан ёсоор нээснийг баяртайгаар мэдэгдье.

Та бүхэнд урам зориг дүүрэн, үр бүтээлтэй арга хэмжээ болохыг хүсэн ерөөе.

Хамтдаа хана хэрмийг нураацгаая!

Анхаарал тавьсанд баярлалаа.